麻疹疫情講兩句:打疫苗不止私事,更是公德! | 中大肝臟護理中心: 閱肝

麻疹疫情講兩句:打疫苗不止私事,更是公德!

最近病重,所以唔能夠長篇去逐點反駁素人父母或反疫苗父母的荒謬言論。以下簡單講兩句。

(1)素人或反疫苗父母類別嘅人好鐘意用人權來打你臉。例如「身為女性,我有拒絕精子進入我體內的權利,點解我無權利拒絕接種疫苗」

第一眼望落去好似好有道理,叫人打疫苗真係好似抹殺緊人類自己選擇的權利。但係我地必須明白,我地活係群體的人類社會,我地嘅一舉一動都有可能會影響別人。人地就可以對你身為社會嘅一份子抱有道德期望。

正如你如果要隨地便溺,其他人都阻止唔到你。但其他人都總可以對你隨地便溺呢種如斯無公德心嘅行為不滿同予以譴責吧?如果你活係荒島,真係無人理你打唔打疫苗,隨唔隨地便溺,但現實就係你並唔係活係荒島丫嘛。

又要自我中心,唔理社會道德期望,又要唔准人地唔滿意你同批判你,簡直惡過北韓。

(2)素人或反疫苗父母類別嘅人好鍾意話麻疹濕濕碎,只需感染就終生免疫,古時未有疫苗日子咪又係咁過。

文科生真係想講讀書真係好重要。已經講咗好多次,係麻疹疫苗發明前,1958-1962年間,美國每年有50萬人死於麻疹[1]。麻疹的威力在於併發症、肺炎、眼炎、腦炎,或麻疹的亞急性硬化性泛腦炎(measles subacute sclerosing panencephalitis),嚴重可致命或永久性傷害。

古時未有疫苗點算?好多人都因感染而死亡,People DIED! People DIED! People DIED!

同埋如果係咁濕濕碎,點解唔整個Facebook/youtube live 直播表演感染麻疹,再用你d 19 順勢療法藥劑、自然療法薑油、精油殺麻疹。到時未可以俾世人知道你d療法有幾勁,千萬唔好用西藥,如果唔係會有confounding factors啊。

(3) 素人同反疫苗父母類別嘅人好鍾意講話「喂,你咁驚又講到麻疹疫苗咁有效,你打咗洗乜驚呀?」

Again,大腦真的是很棒的東西,如果每個人都有就好。麻疹疫苗要一歲先打得,你係咪建議所有一歲以下嘅細路唔好出街,要隔離係屋企?

另外,有個別人士會因為免疫系統問題、服用嘅長期藥物關係或者敏感原因無法接種疫苗,或者打完疫苗都無法製造抗體。咁你係咪建議呢班市民都終生隔離係屋企,唔好出街?

呢d相對較脆弱嘅群體係非常之需要群體免疫(Herd Immunity)嘅保護。但就因為素人同反疫苗父母自私自利嘅想法而令佢地暴露係風險同危險中。

你嘅就係人權,人地嘅就唔係人權?

(4) 有些人會話,你咁怕俾人感染,咁隔離患者咪得囉。

嗯,如果你知道麻疹係出疹前四日係有傳染力而無徵狀嘅話你大概唔會講得出呢句說話。

麻疹嘅威力係佢嘅傳染力驚人,係潛伏期一樣可以感染其他人,即使外科口罩亦唔能夠完成防止受到感染,可以話係防不勝防。

更加重要嘅係,今時今日世界各地嘅交通十分發達,一個感染者坐飛機去另一個國家就可以感染該國市民,而該國市民剛好又去另一個國家又可以感染當地人,麻疹就以幾何級數般傳染開去導致爆發。

簡單來說,不接種疫苗就好似將自己暴露係感染風險嘅同時,令自己有機會成為移動嘅病毒載體。

最有效防治麻疹嘅方法係接種疫苗,為己為人,請及早接種疫苗,如有問題請咨詢家庭醫生。

註釋:
[1] 流行病學數據,在1958-1962年間於疫苗面世前美國每年有50萬人死於麻疹。疫苗面世後於1998年的流行病學數據顯示平均每年只有89人死於麻疹。Source: http://samples.jbpub.com/9781449683795/FrontMatter.pdf (Chapter of 1)

如想發表評論請先登入

訂閱通訊